Afrikaren Asteak bederatzigarren edizioa ospatuko du

Gasteizko Afrikaren Asteak bederatzigarren edizioa ospatuko du datorren larunbatean, maiatzaren 23an, kultur azoka, tailerrak, antzerkia, magia, dantza, moda eta kontzertuak barne hartuko dituen programazioarekin. Ekitaldia Afrikako diasporak hirian dituen erakundeen elkarteak antolatu du, Garapenerako Lankidetzaren Udal Zerbitzuaren laguntzarekin, eta egun osoan zehar egingo da Florida parkeko kioskoaren inguruan.

Jarduera guztiak doakoak eta jende guztiarentzat irekiak izango dira, baina dantza-lehiaketan eta moda-desfilean parte hartzeko beharrezkoa izango da aldez aurretik izena ematea maiatzaren 20a baino lehen.

Programazioa
Jardunaldia 09:00etan hasiko da, kultur azokarekin. Han, Afrikako erakundeek beren lanaren zati bat eta jatorrizko kulturen elementu esanguratsuak erakutsiko dizkiete bertaratzen direnei. Afrika kontinentean proiektuak garatzen dituzten tokiko elkarteek ere parte hartuko dute.

Goizean zehar, publikoari irekitako tailerrak izango dira, horien artean txirikorda afrikarrak eta henna-tatuaje tradizionalak. Gainera, egun osoan zehar ‘Oihal Artean: Afrikako oihalen tradizioa’ erakusketa bisitatu ahal izango da, 11:00etatik 16:00etara gaztelaniazko eta euskarazko bisita gidatuekin.

Horrez gain, Afrikako historian oinarritutako ‘El águila que creció como gallina’ ipuin-kontaketa, haurrei zein helduei zuzendutako euskarazko magia-ikuskizuna eta migrazio-prozesuekin eta Afrikako komunitatearentzat garrantzitsuak diren beste gai batzuekin lotutako errealitateari buruzko sentsibilizazioan oinarritutako antzerki-emanaldia ere izango dira.

Arratsaldean, 16:30etik aurrera, batez ere afrobeat estiloetan eta euskal dantzetan oinarritutako dantza-lehiaketa egingo da. Ondoren, 18:00etan, Afrikako eta Euskal Herriko moda tradizionalaren desfilea egingo da, zuzeneko musikaz lagunduta. Bertan, bi kulturen aberastasuna eta aniztasuna balioetsiko da. Bi jarduerek izaera parte-hartzailea izango dute, eta sariak egongo dira irabazleentzat.

Jaialdiari amaiera emateko, Afrikako eta Euskal Herriko artistek kontzertua eskainiko dute 20:00etatik 23:00etara.

Informazio gehiago